صرخة طفل

01 فبراير، 2009
صرخة طفل



انا صرخه جايه من المحاجر

وادين ضعيفه قاعده ف الدنيا تعافر

وباعلي صوتي نفسي اقول الظلم كافر

انا طفل حتي ولسة مطلعلوش ضوافر

الام حنية وطيبه مالهاش حدود

زالاب قاسي مع انه من جوه ودود

الفقر دا ميراثنا اللي خدناه م الجدود

بنَادي يابلادي ومش لاقيين ردود

عايشين ف غابه فيها اسود وطيور جوارح

ومكن كتير زي الشبح من غير ملامح

وشعارنا فيها خليك مفتح واوعي زهنك يبقي سارح

ومنها مفتوح 100 طريق للقبر رايح

وان حالفك الحظ راح تبقي عاجز م الطرايح

ف يوم ظهرلي شعاع قوي وسط الظلام

صرخ ف وشي وقالي 100 مليون حرام

تعيشو طفولتكو البريئه من غير سلام

وكل حق ليكو راح حتي العلام

وشفت برضه كارت احمر ويا ناس

فيهم امل ووشهم مليان حماس

بيشجعو اللي برجله قام ع الظلم داس

وكرتهم علي الجبابره كانه فاس

وخدونا ودونا المدارس

وحطو حوالينا 100 الف حارس

وقالو بالعلام راح تبقي فارس

ومن يومها علي اول السكه انا روحت دايس

وساعتها شفت حلاوة الدنيا بعنيه

وليكي يابلادي والله راح اكون هديه

من ابتدائي لاعدادي وثانوي ومنها ع الكلية

والناس هاتبقي ف القلب وانتي وحدك اللي ف النيه

لما انحني قدامك انتي هكون قوي ومانيش ضعيف

انا كنت فين دانا كنت مش لاقي الرغيف

والفقر كان الوحش اللي انا كنت قدامه ضعيف

دلوقتي بيكي بقيت شجاع ومسكت سيف

والصحه برضه بقت تمام

واخواتي راحو للعلام

وبدأنا مشروعنا قوام

وبقالنا دخل بانتظام